24 Dec 2016

尋晚好夜先到越南...所以選擇住喺機場附近嘅酒店...

原本對佢嘅早餐冇乜期望...不過又幾好食喎....

跟住出番市區嘅酒店...好好彩...有得免費升級去行政套房...

放低行李再休息一下...就出去附近行下...其實都唔知要去邊度..

不過行行下...都去左幾個地標....紅教堂同埋郵局.....

喺香港一早就Book左按摩...全身按摩...熱石按摩...

再加青瓜面膜....全部加埋九十分鐘....都係百四蚊港紙...

無意中發現按摩店附近有個地踎大排檔...

入左去食下午茶...雖然係買野時好難溝通...但地道野有另一番風味..

行行下去到河邊..咁啱又開始天黑...順便欣賞埋附近嘅夜景..

黎到越南..我就即刻諗起大頭蝦...上網搵下邊度有海鮮食...

最後黎左呢間好多遊客黎嘅...花左一百萬....食左一餐..係越南盾呀..

返到酒店附近...見到間好靚嘅餐廳...忍唔住入去食甜品..

唔知點解...我覺得越南嘅聖誕氣氛..好似比香港濃厚好多....