2022年2月14日, 我如常喺屋企home office, 朝早忽然收到阿媽嘅電話, 佢話佢冇乜胃口叫我唔使煲湯比佢飲, 我當時冇為意, 以為只係食得太多藥所以令到佢冇胃口。到收工之後, 我send message比佢問佢仲有冇唔舒服, 不過佢冇回覆, 再過多一個鐘我打左兩次電話都冇聽, 我即刻搵我細佬問下佢係唔係同阿媽一齊, 佢話佢瞓緊覺, 我先安心一啲。不過再過多半個鐘, 細佬突然話我知, 阿媽唔得喇, 佢叫左白車, 叫我即刻趕去醫院。滿心歡喜以為阿媽手術成功, 點知最後都係要離開我地。
其實近幾年都已經覺得阿媽真係老左, 加上佢嘅身體都越來越差, 所以心裡面已經有佢會離開嘅準備, 只係冇想過會早左十幾二十年突然間走。呢兩日有好多時間都係自己一個人喺屋企, 腦海入面出現好多以前同阿媽一齊嘅畫面。我係一個唔鍾意表達自己嘅人, 但喺心面其實有好多說話想同阿媽講。
其實我自問我都算係愛錫阿媽, 不過一直心裡面都有一個遺憾。我阿爸喺我好細嘅時候就離開左, 由細到大所有大小嘅事都係要靠我自己解決, 由細個自己揀中學, 到之後自己供自己讀大學, 到之後搵到份穩定嘅工作再到最近買到自己嘅一層樓, 雖然唔算係乜野成就, 但我都好自豪, 因為全部野都係靠我自己雙手得到。但始終我都未夠本事可以比到更好嘅生活阿媽, 就算帶阿媽去旅行, 都只可以坐廉航, 喺當地迫地鐵食平價野。雖然我知阿媽都已經好開心, 不過我真係覺得阿媽係值得得到更好。阿媽真係一個大好人, 從來先為人諗跟住先諗自己, 對住仔女同自己兄弟姊妹甚至外人永遠都係無私咁付出, 連自己病都因為唔想麻煩我地所以唔出聲。出生自一個重男輕女嘅家庭, 年輕喪夫, 再遇到一個唔夠愛鍚佢嘅人, 阿媽其實未真正享過福, 我已經盡左最大嘅努力, 可惜我乜都做唔到。
阿媽成日都話佢呢生人最大嘅幸福就係有三個好乖嘅仔女, 佢成日都講三個入面, 我由細到大都唔使佢擔心, 因為我係最成熟最識諗果個, 不過今日再諗番呢番說話, 我感到好愧疚, 因為其實我做得唔夠好, 忽略左佢, 連佢個病去到咁嚴重都完全冇留意到。對唔住, 我真係做得唔夠好, 冇好好照顧你, 我知道呢刻唔會再有機會補救, 但我相信我地第日會喺另一個世界重聚, 我到時一定會做得好啲。阿媽, 我好掛住你, 喺我地未再見面之前, 你要好好照顧自己。
#####################
喺呢個後生仔連Facebook都覺得老土嘅年代, 好多人都好出奇點解我會繼續寫blog。其實當年盛行寫blog嘅時候, 我都係貪得意學人寫下, 原本寫左一段時間都諗住放棄, 不過無意中發現原來有好多人暗地裡有睇我寫嘅野, 默默咁留意住我關心住我, 所以我為左呢啲人風雨不改咁寫左超過10年。隨著最重要嘅讀者嘅離去, 我決定做一個終結, 呢一篇係我喺度最後寫嘅一篇。多謝素未謀面嘅你地咁多年嘅支持, 大家保重, 祝大家身體健康。
