11 Dec 2016

第一次喺酒店食早餐...係有牛扒同雪糕食...仲要係好好食嘅添....

係時候同大阪講再見...今次因為孤寒所以唔買行李quota... 但又買野買到超重...

咁唯有放晒啲野入背囊....然後扮輕鬆....博佢唔磅我個背囊囉...今次過到關...

聽就聽過好多次...但飛機有事故要緊急降落...都係第一次發生喺我身上..

雖然我係想去沖繩...不過唔係喺沖繩機場....坐喺飛機裡面唔郁得果隻囉...

原本平時我喺呢度唔會長篇大論....但我覺得幾隻字係講唔到我今日發生嘅事...

我今日嘅奇遇：

原本我係坐朝早機去高雄再由高雄坐夜機返香港。但係飛機飛左一半之後，機長突然廣播講左一堆日文，但原因係乜都未知，飛機已經緊急降落去沖繩。最初話係小問題應該一個鐘後可以再飛，不過坐左三個鐘之後，最後決定要換飛機，仲要等新果架飛機由大阪飛過黎添。

決定換飛機之後，原來有好多問題要解決。根據日本法例，喺大阪機場買嘅免稅品係唔可以攞番入境，所以全部人都要交比航空公司暫時接管。另外，因為我地呢班人已經出左境，所以亦都唔可以就咁行番入去日本境內。航空公司首先派發一張新嘅登機證，然後大家要一齊落機，去取消番之前個出境紀錄，再喺沖繩重新辦理出境手續，行李都要重新過安全檢查先可以準備再登機。

去到呢個時候，我睇一睇錶，到底我趕唔趕得切今晚班機由高雄返香港呢？我個心越來越焦急，不過都只有繼續等。終於再等一個鐘之後可以上飛機，但係大家又要排隊攞番啲免稅品，結果又等多一個鐘先可以起飛。去到高雄時間緊迫，我又未有下一班機嘅登機證，但又趕唔切櫃檯關之前出去印。最後唯有向客戶服務求助，多得熱心嘅服務員姐姐幫忙，搵左航空公司嘅地勤人員幫我。轉機櫃檯一早就關門大吉，要麻煩關員哥哥為我一個人開機，再由秘道返去登機閘口。當我諗緊點解會趕得切嘅時候，我先知道原來我死好命，原本飛返香港嘅航班delay左所以先等埋我，總算有驚無險可以返香港。