31 Aug 2012

 之前阿媽買定好多蛋糕麵包去殯儀館...諗住大家肚餓時可以食....
不過似乎冇乜人有興趣...結果剩番唔少...食得唔好嘥...攞番公司做早餐..

早兩日先開左個馬拉松會...咁快又到我地部門o既例會.....同樣都係咁悶...

尋日都冇時間準備飯盒....所以今日出左去食lunch.....
一樣係去翠華....一樣係叫果d 野食.....不過唔同o既係....今日係同B 去食..

我地又發揮我地o既極速進食....所以仲有大把時間.....可以周圍行下....
經過公利...買左一個蔗汁糕返去公司share....仲o係門口對出見到余文樂添....

原本放工諗住去做運動....但我諗...我又作感冒....都係返屋企啦...
正當我o係公司走o既時候...阿媽打俾我話佢地叫飯盒....於是就返左屋企食...

30 Aug 2012

今日阿婆出殯....所以我專登攞左一日假....
我諗應該都好晏先會有野食.....朝早都係要食飽 d ....

又經過左好多儀式.....再去火化......係時候要同阿婆講再見.....

旅遊巴直接由火葬場駛返旺角.....今日黎o既親友唔多...基本上只係我地自己家人去食餐英雄飯...

原本今日要去上羽毛球班...不過唔知幾時整傷左個膀頭...所以打唔到波....要走堂...
唔好浪費左下半晝假期...爭取時間.....去做下運動先.....

近排見過好幾次報紙雜誌介紹《女朋友●男朋友》...望一望錶...就到時間喎...自己一個去睇...
一個無奈o既三角戀故事...我愛的人不愛我...愛我的人我不愛....睇到有d 眼濕濕...

睇完戲都已經六點幾.....阿媽話佢地會落街食飯...不過我覺得好攰...寧願買外賣返屋企..
尋日去殯儀館時...o係鑽石山地鐵站見到間爭鮮...好想食...今日走左去太子果間買..

29 Aug 2012

有d 野做...所以同B 要早d 返公司....佢負責做公司野...而我就負責幫佢買埋早餐..

心裡面定左一個日子......開始著新衫返工.....就係今日喇..

下晝同K 出左去翠華食lunch.....

跟住就要返去開個馬拉松悶會....仲要係同d 大粒o既一齊開添....真係悶足兩個鐘...

開完會已經好攰....返到office 仲要見到我個位七國咁亂...更加俾個借口自己唔好做野啦...等放工...

選擇今日著新衫....其實我係諗住著得靚靚....去送阿婆最後一程....雖然我唔明d 玫瑰經講乜...
更加唔明點解要重複又重複咁朗讀...不過如果對阿婆好..咁都無妨..

返到旺角已經接近十點.... 大家都未食野.....去左飲夜茶.....

28 Aug 2012

今朝繼續係蘋果 + 麵包.....唔知可以維持幾耐呢.........

尋日同今日o既lunch 係一樣o既餸....不過尋日食左個肥爆撈麵....
今日改左做米粉......應該冇咁肥喇卦...........

都有一段時間冇去睇中醫.....今日放工過左去一轉......個身體係時候要維修一下....

跟住過番灣仔.....同隔離部門o既同事一齊 happy hour......原本想早d 返屋企....
不過難得同d 同事聯誼一下...唔經唔覺...飲到成九點幾先走...如果聽日唔使返工就好lu...

27 Aug 2012

真係要開始食番少d ......早餐一個蘋果....再加兩塊包都夠....

嘩.......我都知係肥架喇.....不過冇諗過......等如半碗飯囉.....
但我最鍾意食燒味飯多薑蓉....做乜要俾我睇到呢個事實呢........

今日o既lunch 係烚瓜烚雞胸.........不過可惜加左個肥爆o既撈麵.....

放工去做運動......之後去左食吉野家......見到呢個新o既三重芝士飯....
好想試......兩個人 share 一個......應該都唔會好肥啫.......

都唔記得我自己做過d 乜......竟然收到張 HSBC 寄黎o既咖啡券........
不過都唔使理原因.....最緊要有免費咖啡飲啫........

今晚屋企無端端出現左個蛋糕.....原來係我阿妹補送俾我阿媽o既生日蛋糕...
個樣係就係醜樣左d ........不過都係一番心意黎o既.....

26 Aug 2012

起左身...但懶得落街....開左包灣仔碼頭做早餐....

不過都唔懶得幾耐....始終都要落街....買餸..........

呢兩日上youtube睇左幾場羽毛球比賽......因為想睇下到底d 職業球手係點打波....
佢地d 步法真係好靚好靈活......我諗我呢世都冇辦法學到....連一半都冇....

下晝自己一個人出左尖沙咀行街.....咁啱行到新港.....有少少肚餓....
見到一風堂.....雖然已經兩點幾..不過門口都堆滿人....好在我得一個人...唔使等..

行行下...都行左兩三個鐘....係時候返屋企.....
有少少攰....諗住o係屋企休息下...不過諗起尋日食左咁多野....都係唔好咁懶...

之後過左去又一城.....有人話請我食飯....同我慶祝升職....去左食 EXP....多謝...

25 Aug 2012

今日係阿媽生日....原本我一早都醒左....不過都等埋一齊先去食早餐....
佢突然話想去名寶石餐廳....要成六十蚊一個人...不過無論食物同環境...都物非所值..

收到退稅o既支票..今年竟然有得退....都有少少驚訝...不過...即係證明其實我唔係搵好多錢啦..

下晝去左做運動.....之後再去行下街......
跟住去左美心食下午茶....雞髀 + 紅豆冰...永遠都係最經典o既 tea....

唔知係咪訓得唔好....返到屋企...就訓左....訓醒o既時候.....
已經夠鐘去食晚飯......又係去我屋企o既飯堂食buffet........

又係果幾款野食....都冇乜食慾....不過都好....可以食少 d ......哈哈....

今年我買左個顏色 sharp d o既手袋俾阿媽.....唔好來來去去都係果兩隻色啦...

佢仲收到大師傅送o既榴槤蛋糕添.....

24 Aug 2012

終於挨到星期五喇.....要食番餐好d o既早餐....迎接weekend

今日冇帶飯....自己一個人出左去買外賣...諗起雜誌見到有間泰式車仔麵.....
即管去試下....不過又唔錯喎....呢個冬蔭公湯底好正.....再加多罐椰青水襯番...

呢兩日都食蕉...今日都唔例外...

放工約左 Ray 哥去食左個 early dinner........o係IFC 樓下間添好運食點心....

去 IFC o既原因...係因為我地之後要坐機鐵入博覽館站....Ray 哥有免費o既拳賽飛....
帶埋我去睇...原價成六百幾蚊架...我就真係唔會捨得俾錢睇...多謝帶我去見識下...

o係電視都睇過下拳賽o既...不過現場睇就係第一次....原來係好緊張刺激....
不過見到打到噴晒血....真係嚇死......我諗一定係好痛架喇....

23 Aug 2012

晏左起身....冇時間去買早餐....攞左上次B 買俾我o既粟米味噌蕎麥麵....
本身冇湯粉....只係得包味噌....估唔到又幾好味喎....

煮埋之前剩番o既椰菜....再加埋一包餃子.....變成今日o既lunch....

又到左星期四......去上羽毛球班......唔經唔覺已經第七堂....接近尾聲lu...

今日阿sir 冇乜講野....差唔多打足個幾鐘.....所以非常攰....
返到屋企.....o係雪櫃搵到包即食意粉.....即刻叮黎食....